İyulun 20-si gecə saatlarında Rusiya hava hücumundan müdafiə sistemləri bu ölkənin regionları üzərində Ukraynanın 381 pilotsuz uçuş aparatını (PUA) məhv edib.

Bu barədə Rusiya Müdafiə Nazirliyi məlumat yayıb.

Moskva meri Sergey Sobyanin bildirib ki, Moskva bölgəsində 400-dən çox PUA aşkar edilib. Onun sözlərinə görə, PUA-ların əksəriyyəti uzaq məsafədə zərərsizləşdirilib, daha 85 dron isə paytaxta yaxınlaşarkən vurulub.

Moskva vilayətinin qubernatoru Andrey Vorobyovun sözlərinə görə, hava hücumundan müdafiə və elektron müharibə qüvvələri bölgəyə hücumu dəf edib. Əsas ziyan Podolsk, Domodedovo və Odintsovo şəhər rayonunda qeydə alınıb. Moskva vilayətində PUA hücumu nəticəsində on nəfər, o cümlədən bir uşaq yaralanıb. Domodedovo xəstəxanasının mətbuat xidməti bildirib ki, altı nəfər müxtəlif dərəcəli mina və partlayış xəsarətləri ilə xəstəxanaya yerləşdirilib, onlardan üçü xarici vətəndaşdır.

Podolskda dronların qəzaya uğraması nəticəsində yanğınlar baş verib, bir neçə mülki infrastruktur obyektinə və Maloye Tolbino kəndində fərdi evə ziyan dəyib. Odintsovo şəhər rayonunda bir avtomobil və fərdi evə ziyan dəyib, lakin xəsarət alan olmayıb.

Bundan əlavə, Krasnodar diyarı əməliyyat qrupunun məlumatına görə, Yeyskdə dronların düşməsi nəticəsində bir qadın xəsarət alıb.