Oktyabrın 24-nə keçən gecə Ukrayna Müdafiə Qüvvələri Rusiyanın Oryol şəhərində “Tolyattikauçuk” zavodunu, “Proton-Elektrotex” ASC-ni və Yeysk aerodromundakı təyyarəni vurub.

Bu barədə Ukrayna Silahlı Qüvvələri Baş Qərargahının “Telegram” kanalına istinadla xəbər verir.

Məlumata görə, Rusiyanın Oryol vilayətinin Oryol şəhərində yerləşən “Proton-Elektrotex” ASC-nin əsas istehsal binası vurulub.

Bu, Rusiya ordusunun Ukrayna şəhərlərini vurmaq üçün istifadə etdiyi qanadlı və ballistik raketlər üçün komponentlərin istehsalını çətinləşdirir.

“Proton-Elektrotex” ASC Rusiyanın kristallardan hazır məhsullara qədər tam istehsal dövrünə malik aparıcı optoelektron avadanlıq və cihaz istehsalçısıdır. Bunlara S-71 “Kovyor” qanadlı raketləri üçün modullar və 9M723 “İsgəndər-M” ballistik raketləri üçün inverter açarları daxildir. Əməkdaşlıq çərçivəsində şirkət, həmçinin “Pantsir-S1” yer-hava raket sistemlərinin və onların modifikasiyalarının istehsalında iştirak edir.

Rusiyanın Samara vilayətinin Tolyatti şəhərindəki “Tolyattikauçuk” zavoduna da ziyan dəyib. Onun yaxınlığında partlayış və yanğın baş verdiyi bildirilib.

Bundan əlavə, Rusiyanın Krasnodar diyarındakı Yeysk aerodromunda təyyarə də vurulub. Zərərin miqyası müəyyənləşdirilir.