27 fevral tarixində Beynəlxalq Muğam Mərkəzində bəstəkar Sevda Rəhimovanın “Ömür yollarının sədası” adlı müəllif gecəsi keçirilib.

Bədii rəhbəri əməkdar müəllim Zülfiyyə Sadıxova olan konsert proqramında müəllifin ondan artıq əsəri səsləndirilib. Onların arasında Bəxtiyar Vahabzadə, Nəbi Xəzri, Leyla Əliyeva, həmçinin Hamlet İsaxanlı və Xəzər Süleymanlının şeirlərinə bəstələnmiş romanslar yer alıb.

Səhnədə “Xəzər” Universitetinin kamera orkestri çıxış edib, dirijor pultu arxasında isə Hüseyn Kərimov olub.

Konsertdə tanınmış ifaçılar və musiqiçilər — əməkdar artistlər Fəridə Məmmədova və İlham Nəzərov, eləcə də Ərtoğrul Balaev, Səxavət Məmmədov, Rəğyar Səfərov, Rauf Məmmədzadə və digər musiqiçilər iştirak ediblər. Hər bir çıxış tamaşaçıların gur alqışları ilə müşayiət olunub.

Gecənin sonunda Sevda Rəhimova müəllimi, görkəmli Azərbaycan bəstəkarı Arif Məlikovun xatirəsi qarşısında ehtiramını və minnətdarlığını ifadə edib. Qonaqlar arasında Arif Məlikovun sinfində təhsil almış tanınmış incəsənət xadimləri — əməkdar artist Elza Seyidcahan, Rəsimə Seyidcahan, professor, əməkdar incəsənət xadimi Həccər Babayeva və digərləri də olublar.

Gecə səmimi ilham və dərin emosional yüksəliş ab-havasında keçib. Sevda Rəhimovanın lirizm və incə koloritlə zəngin klassik musiqisi dinləyicilərin qəlbində canlı əks-səda doğuraraq müasir Azərbaycan bəstəkarlıq məktəbinin zənginliyi və çoxşaxəliliyinin növbəti parlaq təzahürünə çevrilib.