Azərbaycanlı iş adamı və sənətçi Emin Ağalarov Özbəkistanın paytaxtı Daşkənddə keçirilən Tashkent International Investment Forumda iştirak edib.

Emin Ağalarov tədbir çərçivəsində Özbəkistan Prezidenti Şavkat Mirziyoyevlə görüşüb və bu görüşdən kadrları sosial şəbəkə hesabında paylaşıb.

Ağalarov paylaşımında bildirib ki, forum çərçivəsində məşhur mədəni-turizm layihəsi olan Sea Breeze–Özbəkistan təşəbbüsünə rəsmi olaraq start verilib. Bu layihə Azərbaycanın Xəzəryanı bölgəsində uğurla tətbiq edilən və indi də Özbəkistanda reallaşdırılması planlaşdırılan çoxprofilli bir mədəni-sosial platformadır.

Paylaşılan görüntülərdə Emin Ağalarovla Prezident Şavkat Mirziyoyevin səmimi dialoqu və əl sıxması əks olunub. Görüş zamanı Özbəkistan rəhbərliyi ilə gələcək əməkdaşlıq imkanları müzakirə olunub, “Sea Breeze”in bu ölkədə tətbiqi ilə bağlı texniki və strateji detallara toxunulub.

Emin Ağalarov forumun yüksək səviyyəli iştirakçısı kimi çıxışında qeyd edib ki, layihə artıq Özbəkistanda həyata keçirmək mərhələsinə keçib və növbəti addım infrastrukturun formalaşdırılması və mədəni tədbirlərin təşkili olacaq.